पुणे : इंटरनेटवर भारतीय भाषांतून आरोग्यविषयक अधिकाधिक लेखन केले जावे, त्या विषयातील जास्तीत जास्त माहिती, ज्ञान इंटरनेटवर यावे यासाठी विकिपीडियाने ‘विकिपीडिया- स्वस्थ’ हा विशेष प्रकल्प सुरू केला आहे. ‘विकिपीडिया-स्वस्थ’द्वारे भारतीय भाषांतून अधिक आरोग्य ज्ञान उपलब्ध करण्यासाठी विशेष प्रयत्न केले जाणार आहेत. ‘विकिपीडिया-स्वस्थ’चे प्रकल्प संचालक अभिषेक सूर्यवंशी यांनी ही माहिती दिली.
‘विकिपीडिया’च्या १९व्या वर्धापनदिनी ही माहिती देण्यात आली. १५ जानेवारीला ‘विकिपीडिया’चा वर्धापनदिन असतो. ‘Special Wikipedia Awareness Scheme For The Healthcare Affiliates – SWASTHA’ असे या प्रकल्पाचे नाव आहे.
आताही आरोग्यविषयक लेखन, माहिती आणि ज्ञान इंटरनेटवर, विकिपीडियावर उपलब्ध आहे; मात्र त्याचे प्रमाण कमी आहे. भारतीय भाषांतून आरोग्यविषयक अधिकाधिक ज्ञान विकिपीडियावर यावे, यासाठी विशेष मोहिमेद्वारे विकिपीडिया कम्युनिटी उत्तेजन देणार आहे. इंग्रजीबरोबरच भारतातील हिंदी, मराठी, कन्नड, मैथिली, उडिया, तमिळ, तेलुगू, बंगाली, गुजराती, उर्दू या भाषांतून आरोग्यविषयक लेख विकिपीडियावर आणण्यासाठी प्रयत्न केले जाणार आहेत. २०२१पर्यंत ५०० मिलियन इंटरनेट युजर्स स्थानिक भाषा वापरू लागतील, असा गुगलचा अहवाल आहे. त्यात भारतीय भाषा आघाडीवर असणार आहेत. भारतीयांचा इंटरनेटवरील इंग्रजीपेक्षा स्थानिक भाषांतील माहितीवर अधिक भरवसा आहे.
अभिषेक सूर्यवंशी म्हणाले, ‘गुगलद्वारे माहिती शोधताना विकिपीडियावरची माहितीदेखील युजर्सना उपलब्ध केली जाते. ही माहिती उपयोगात आणणाऱ्यांमध्ये भारतीय युजर्स आघाडीवर आहेत. इंटरनेटवर शोध घेताना भारतीय युजर्सकडून आरोग्यविषयक माहिती शोधण्याचे प्रमाण अधिक आहे. त्यामुळेच आरोग्यविषयक माहितीचा साठा समृद्ध करण्याचा निर्णय विकिपीडियाने घेतला आहे. ही माहिती भारतीय परिस्थितीशी सुसंगत असले पाहिजे, याची काळजी घेतली जात आहे.’
वैद्यकीय व्यावसायिक, डॉक्टर्स, वैद्यकीय महाविद्यालये, लेखक, पत्रकार, वाचक अशा सर्व स्तरांतील युजर्सना ‘विकिपीडिया-स्वस्थ’वर माहिती देण्यामध्ये लेखन योगदान देता येईल. त्यासाठी देशभर मोफत कार्यशाळा घेण्याचे नियोजन करण्यात आले आहे. या प्रकल्पात सहभागी होऊ इच्छिणाऱ्यांनी director@wikiswastha.org या ई-मेल आयडीवर संपर्क साधावा, असे आवाहन करण्यात आले आहे.
